শদিয়াৰ বুঢ়া-বুঢ়ী শালৰ আন্তঃগাঁথনি উন্নয়ন প্ৰকল্পৰ ভূমি পূজন অনুষ্ঠানত উপস্থিত থাকে মুখ্যমন্ত্ৰী হিমন্ত বিশ্ব শৰ্মা । “বুঢ়া বুঢ়ী শাল”ৰ উন্নয়নৰ বাবে নিৰ্মিত প্ৰকল্পটো ৮.৭৩ কোটি টকা ব্যয় সাপেক্ষে নিৰ্মাণ কৰা হৈছে । ইয়াৰ পিছতেই সংবাদ মাধ্যমৰ আগত ৰাজ্যত চলি থকা শেহতীয়া উচ্ছেদ অভিযান সন্দৰ্ভত প্ৰতিক্ৰিয়া প্ৰকাশ কৰে মুখ্যমন্ত্ৰী হিমন্ত বিশ্ব শৰ্মাই । পৰ্যায়ক্ৰমে সকলোতে উচ্ছেদ অভিযান চলাই চৰকাৰী ভূমি অবৈধ বেদখলৰ পৰা মুক্ত কৰা হ’ব বুলি মন্তব্য কৰে মুখ্যমন্ত্ৰী গৰাকীয়ে ।
উল্লেখযোগ্য যে, উচ্ছেদ সন্দৰ্ভত অলপতে মুখ্যমন্ত্রীয়ে সংবাদমেলযোগে সদৰী কৰিছিল যে ২০২১ চনৰ পৰা চলিত বৰ্ষৰ ১২ জুলাইলৈকে বিগত চাৰিবছৰত ৰাজ্যৰ মুঠ ১,১৯,৫৪৮ বিঘা ভূমি বেদখলমুক্ত কৰা হৈছে । এই সময়চোৱাত ১৬০ বৰ্গ কিলোমিটাৰ ভূমি বেদখলমুক্ত কৰা হৈছে আৰু ৫০ হাজাৰ লোকক উচ্ছেদ কৰা হৈছে ।
আনহাতে মুখ্যমন্ত্রীয়ে সদৰী কৰা অনুসৰি ৰাজ্যৰ বনাঞ্চলকে ধৰি বিভিন্ন শ্ৰেণীৰ ৬৩ লাখ বিঘা ভূমি এতিয়াও বেদখলকাৰীৰ কৱলত আছে । অৱশ্যে ইয়াৰ ভিতৰত থকা জনজাতীয় লোকসকলক ভূমিৰ পট্টা দিয়া হ’ব বুলিও উল্লেখ কৰে মুখ্যমন্ত্রীগৰাকীয়ে । বনাঞ্চলৰ ২৯ লাখ বিঘাৰো অধিক ভূমি বেদখল হৈ আছে । এই বৃহৎ পৰিমাণৰ ভূমি বেদখলমুক্ত কৰাৰ বাবে চৰকাৰক আৰু অধিক সময়ৰ প্ৰয়োজন হ’ব বুলি মুখ্যমন্ত্রীগৰাকীয়ে সদৰী কৰে।
